happykid
ბავშვის ტანსაცმლის შეძენაზე გადაწყვეტილების მიღება არც ისე მარტივია. გარდა იმისა, რომ სამოსი უნდა იყოს ლამაზი, მხედველობაში უნდა მივიღოთ მისი კომფორტულობა, უსაფრთხოება და ხარისხი. ასევე არ უნდა დაგვავიწყდეს ბიუჯეტიც, რაც ხშირად გადამწყვეტ როლს თამაშობს ხოლმე.
 
 
ბავშვებს, როგორც წესი, ბევრი ტანსაცმელი სჭირდებათ. ერთია, რომ იზრდებიან და ის, რაც გაზაფხულზე კარგად ჰქონდათ, შემოდგომაზე შესაძლოა, აღარ მოერგოთ. მეორეს მხრივ კი, ისინი ტანსაცმელს ვერ და არ უფრთხილდებიან და სწრაფად ისვრებიან, ხშირი რეცხვა კი ქსოვილს აზიანებს. ხშირად ისეც ხდება, რომ შარვალი ან პულოვერი ისე დაუპატარავდებათ, რომ ერთხელაც არ ჩაუცვამთ. მშობლებს კი ისევ და ისევ უწევთ შეძენაზე ზრუნვა, რაც სახალისო არ არის, თუ ტანსაცმლის შერჩევის კრიტერიუმები წინასწარ არ აქვთ განსაზღვრული.
რა უნდა გავითვალისწინოთ, სანამ ბავშვს სამოსს ვუყიდით? გთავაზობთ რამდენიმე რჩევას, რომელიც გაგიადვილებთ შოპინგსა და გადაწყვეტილების მიღებას.
 
 
1. დარწმუნდით ქსოვილის ხარისხში - ეს განსაკუთრებით მნიშვნელოვანია ჩვილობისას, თუმცა მოზრდილი ბავშვებისთვისაც რეკომენდებულია ბამბის ტანსაცმელი, რადგან მათ მგრძნობიარე კანი აქვთ. ბამბის ქსოვილი რბილია, „სუნთქავს“ და იწოვს ოფლს. ზამთარში გამოგადგებათ შალისა და მატყლის სამოსი, რომლებიც ასევე მაღალი ხარისხის მასალად ითვლება, თბილი და ბუნებრივია.
 
2. შეარჩიეთ პრაქტიკული ტანსაცმელი - ისეთი, რომელიც სარეცხ მანქანაში ირეცხება. ლამაზი და მოდური არ ნიშნავს აუცილებლად არაპრაქტიკულს. ბავშვის ტანსაცმლის მწარმოებლები უკვე დიდი ხანია ითვალისწინებენ მშობლების დაკავებულობას და არჩევანი ამ მხრივაც დიდია.
 
3. შეიძინეთ ზომაზე დიდი ტანსაცმელი - პირველ რიგში იმიტომ, რომ ზოგიერთი ქსოვილი, მაგალითად ბამბა, გარეცხვის შემდეგ მჭიდროვდება და ზომაში ოდნავ იკლებს. გარდა ამისა, ბავშვები სწრაფად იზრდებიან. თუ სამოსი 1-2 ზომით დიდი იქნება, ბავშვი მას მალე მოირგებს, თქვენ კი დაზოგავთ თანხას და გაზრდით დროს შემდეგ შოპინგამდე.
 
4. მოერიდეთ ბევრდეტალიან სამოსს - უმჯობესია ბავშვის ტანსაცმელი მარტივი დიზაინის და ადვილი გასახდელი იყოს, რადგან ხშირად მშობლებს ექსტრემალურ პირობებში უხდებათ ბავშვის გამოცვლა. ასეთ დროს კი მნიშვნელოვანია, შესაკრავი ადვილად გაიხსნას.
 
5. შეარჩიეთ მკვეთრი ფერის სამოსი - შესაძლოა, თქვენი გოგონასთვის ღია, ნაზი და პასტელური ფერების ტანსაცმელისკენ მიგიწევდეთ გული, მაგრამ გახსოვდეთ, ფაფაში ამოვლებული ბავშვის გამოცვლაზე ისევ თქვენ ხართ პასუხისმგებელი. განსაზღვრეთ ტანსაცმლის ფერი ბავშვის კანისა და თმის ფერის მიხედვით. შესაძლოა, ვარდისფერზე მეტად თქვენს შავგვრემან გოგონას წითელი უხდებოდეს. მოერიდეთ ზედმეტად მუქ ტანსაცმელს. მიუხედავად იმისა, რომ შავი ქურთუკი მოსახმარად მარტივია, ბავშვის ასაკისთვის მკვეთრ ფერებზე არჩევანის შეჩერება სჯობს. და სხვათაშორის, თუ ჰკითხავდით, სავარაუდოდ, მათაც სიჭრელე მოეწონებათ.
 
6. შეიძინეთ ბავშვური ტანსაცმელი - ხშირად მშობლებს სურთ, შვილები მათი ასლებივით გამოიყურებოდნენ და ყიდულობენ ისეთი სტილისა და მოდელის სამოსს, რომელიც მხოლოდ დიდებისთვის თუ იქნება მისაღები. გახსოვდეთ, რომ ბავშვობის პერიოდი მალე გადის, დიდობა კი წინ არის. თქვენი შვილი ყოველთვის მოასწრებს ისე ჩაიცვას, როგორც თქვენ.
 
 
როგორც ხედავთ, საბავშვო ტანსაცმლის შერჩევისას არა ერთი ფაქტორის გათვალისწინებაა საჭირო: დაწყებული სამოსის ფერით, დამთავრებული ქსოვილის ხარისხით. მიუხედავად იმისა, რომ საბავშვო მოდა თითქმის ისეთივე დიდი და მზარდი ინდუსტრიაა, როგორც დიდების და მშობლები ინტერნეტში გავრცელებული ტრენდების გავლენას განიცდიან, საბოლოოდ ბავშვის ტანსაცმლის ყიდვისას მთავარი კრიტერიუმი მაინც ხარისხი და კომფორტულობაა. ცხადია, ერთი-ორ გაპრანჭულ პერანგს თუ კაბას განსაკუთრებული შემთხვევებისთვის ყველა ბავშვი იმსახურებს.
 
 
საქართველოში საბავშვო პროდუქციას არა ერთი კომპანია თუ ბრენდი აწარმოებს. მათი რაოდენობა, საბედნიეროდ, დღითიდღე იზრდება. ბოლო პერიოდში არა ერთი მცირე მეწარმე და სოციალური საწარმო გამოჩნდა, რომლებიც ქართველ მომხმარებელს ხარისხიან, ლამაზ და კომფორტულ პროდუქციას სთავაზობენ. ბევრი მათგანი არ ფლობდა სრულფასოვანი ონლაინ შოპინგის შესაძლებლობას, თუმცა მას შემდეგ, რაც ბაზარზე HAPPYKIDS.GE გამოჩნდა, ასეთი ბრენდებისა და მეწარმეებისთვის შეიქმნა ციფრული გაყიდვების სივრცე. მომხმარებელს კი მიეცა შესაძლებლობა, იშოპინგოს სახლიდან გაუსვლელად და, ამავდროულად, ხელი შეუწყოს ადგილობრივი წარმოების განვითარებას.

სტატიის ავტორი სალომე მუმლაძე, 2021-01-27